En cest sonet coind´e leri

texto - Arnaut Daniel

fragmentos musicais - Edgard Varèse, Ivo Malec, Iannis Xenakis, Antônio Jardim

composição - Márcio-André (1ª parte) e Victor Paes (2ª parte)

coreografia - Victor Paes

voz e lata de tinta - Victor | alfaia - Antônio | caixa - Romulo | violino - Márcio-André | teclado e CD - Lucas

En cest sonet coind´e leri

Fau motz e capuig e doli,

E serant verai e cert

Quan n´aurai Passat la lima;

Qu´Amors marves plan´e daura

Mon chantar, que de liei mou

Qui prez manten e governa.

Tot jorn meilur et esmeri,

Car la gensor serv´e coli

Del mon, so´us dic en apert.

Sieus sui del pe tro qu´en cima,

E si tot venta´ill freid´aura,

L´amours qu´inz el cor mi plou

Mi ten chaut on plus iverna.

Mil messas n´aug e´n proferi

E´n art lum de cera e d´oli

Que Dieus m´en don bon issert

De líeis on no´m val escrima;

E quan remir as crin saura

E´l cors gai, grailet e nou

Mais l´am que qu´im des Luserna.

Tant l´am de cor e la queri

C´ab trop voler cug la´m toli,

S´om ren per ben amar pert.

Qu´el sieus cors sobretracima

Lo mieu tot e no s´eisaura;

Tant a de ver fait renou

C´obrador n´a e taverna.

No vuoill de Roma l´emperi

Ni c´om m´en fassa apostoli,

Qu´en líeis non aia revert

Per cui m´art lo cors e´m rima;

E si´l maltraich no´m restaura

Ab un baisar anz d´annou

Mi auci e si enferma.

Ges pel maltraich qu´ieu soferi

De ben amar no´m destoli,

Si tot me ten en desert,

C´aissi´n fatz los motz en rima.

Pieitz trac aman c´om que laura,

C´anc plus non amet un ou

Cel de Moncli n´Audierna.

Ieu sui Arnautz qu´amas l´aura

E chatz la lebre ab lo bou

E nadi contra suberna.